अस्पतालले भर्ना लिन नमानेका चौधरीको रिपोर्ट Covid-19 ‘नेगेटिभ’

खेलकुद १२ चैत्र २०७६, बुधबार Hits : 453
अस्पतालले भर्ना लिन नमानेका चौधरीको रिपोर्ट Covid-19 ‘नेगेटिभ’

दिनेश चौधरी तिनै व्यक्ति हुन्, जसले अस्पतालमा भर्ना भई उपचार पाउन तीन दिनसम्म रुपन्देहीबाट चितवन हुँदै काठमाडौंसम्म र काठमाडौंबाट फर्केर फेरि रुपन्देहीसम्म ७ वटा अस्पताल चाहार्नुपरेको थियो ।

चैत ३ गते पृथ्वीचन्द्र अस्पताल परासीमा जाँच गराएका उनलाई कोरोनासँग मिल्दोजुल्दो लक्षण देखिएको आशंकामा अस्पतालले थप उपचारका लागि चैत ४ गते लुम्बिनी प्रादेशिक अस्पताल बुटवल पठायो ।

तर चौधरीलाई लुम्बिनी प्रादेशिक अस्पतालले भर्ना नलिएपछि उनलाई चितवनको पुरानो मेडिकल कलेज पुर्‍याइयो । उक्त मेडिकल कलेजले कोरोनाको आशंका गर्दै काठमाडौं टेकू अस्पताल रिफर गर्‍यो ।

तर बिरामीका आफन्तले चौधरीलाई टेकु नलगी अर्कै अस्पतालमा पुर्‍याए । उक्त अस्पताले उपचार नगरेपछि चौधरीलाई चैत ६ गते बिहान रुपन्देहीको क्रिमसन अस्पताल मणिग्राममा ल्याइयो । क्रिमसनले पनि भर्ना नलिएपछि लुम्बिनी प्रादेशिक अस्पतालमा ल्याइयो । तर बेड नभएको भन्दै अस्पतालले चौधरीलाई भर्ना गरेन ।

त्यसपछि उनलाई देवदह मेडिकल कलेजमा पुर्‍याइयो । देवदहले पनि भर्ना नगरेपछि फेरि पृथ्वीचन्द्र अस्पताल परासीमै पुर्‍याइयो । परासीमा आइसोलेसन वार्ड र सुरक्षा सामग्री नभएकाले उपचार सम्भव नभएकाले विरामी त्यही अलपत्र परेर बसे ।

चौधरीलाई सरकारी र निजी अस्पताल तथा मेडिकल कलेजहरुले भर्ना नलिएको र उपचारबाट बञ्चित भएको जानकारी मुख्यमन्त्रीसम्म पुगेपछि बल्ल चैत ६ गते साँझ चौधरीले लुम्बिनी प्रादेशिक अस्पतालमा भर्ना भई उपचार पाएका हुन् ।

योसंगै लुम्बिनी प्रादेशिक अस्पतालमा कोभिड १९ को आशंकामा हालसम्म नमूना परीक्षण गरिएका ६ जनाको रिपोर्ट ‘नेगेटिभ’ आएको छ । कोभिड १९ को आशंकामा आइसोलेसन वार्डमा मंगलबारसम्म १३ जना भर्ना भएकामा अब ४ जनाको स्वाब परीक्षणका लागि पठाउन बाँकी रहेको र दुईजनाको रिपोर्ट आउन बांकी रहेको डा. थापाले जानकारी दिए ।

चारजना विरामी मंगलबार मात्रै कोरोना विशेष आइसोलेसन अस्पताल (धागो कारखाना भवन) मा भर्ना भएका छन् ।

जनाअवजको टिप्पणीहरू