५७ औं अन्तर्राष्ट्रिय जातीय विभेद तथा रंगभेद उन्मूलन दिवसमे र्याली एंव प्रतिबद्धता कार्यक्रम कञ्चनपुरके भीमदत्त नगरमे हुइल बा ।
कार्यक्रमके उद्घाटन करटि संविधान सभा सदस्य एंव दलित आन्दोलनके राष्ट्रिय अगुवा हरि श्रीपाईली दलित समुदायउप्पर अभिन फेन जातीय विभेद तथा मानवअधिकार हननके तमाम घटना घटल बटैलैं ।
उहाँ ओइसिन घटना अन्त्यके लाग तीनु तहके सरकार थप जिम्मेवार बनेपरना बटैलैं । पूर्व सांसद श्रीपाईली जातीय विभेद अन्त्य समतामूलक न्यायिक समाज निमार्ण ओ दलित एंव सीमान्तकृत समुदायके अधिकार ओ समग्र विकासके लाग प्रदेश सरकार दीर्घकालीन ठोस नीति तथा कार्यक्रम अभियानके रुपमे संचालन करेपरनामे जोड डेलैं ।
कार्यक्रममे कञ्चनपुरके प्रमुख जिल्ला अधिकारी रामप्रसाद पाण्डेय, भीमदत्त नगरपालिका उपप्रमुख सुशीला चन्द, कञ्चनपुर प्रहरी प्रमुख श्यामसिंह चौधरी, नेपाल दलित संघका अध्यक्ष गणेश नेपाली, दलित नेता हिरा सार्कीलगायत मन्तव्य व्यक्त करले रहैं ।
कार्यक्रममे वक्ताहुक्रे दलित समुदायके पक्षमे बनल ऐेन कानुनके प्रभावकारी कार्यान्वयनमे जोड डेले रहैं ।
कार्यक्रम कञ्चनपुरस्थित दलित एंव सीमान्तकृत समुदायके अधिकारके क्षेत्रमे कार्यरत संघसंस्थाके संयुक्त आयोजनामे हुइल रहे ।
