नेपाल आदिबासी जनजाति पत्रकार महासंघ (फोनिज) के केन्द्रीय अध्यक्षमे गजुरधन राई निर्विरोध चयन हुइल बाटै । इहे चैत ६ ओ ७ गते चितवनके सौराहामे हुइल सातौं संघीय महाधिवेशनसे राईहे निर्विरोध चयन करल हो ।
ओस्टके कार्यसमितिके वरिष्ठ उपाध्यक्षमे लक्की चौधरी, उपाध्यक्ष खुलामे अमरध्वज लामा, मिरा राज भण्डारी, जगत दोङ (संस्थागत), सरु राना (महिला), कमन देवान (अल्पसंख्यक), टेक बहादुर थामी (अल्पसंख्यक) ओ महासचिवमे मिलन लिम्बु निर्विरोध चयन हुइल हुइट । कलेसे सचिव लगायत टमान पदमे भर चुवानी प्रक्रियासे पदाधिकारी चयन करल हो ।
फोनिजमे देशभरके ६० जिल्ला शाखा, ७ प्रदेश समिति ओ ८ ठो वैदेशिक शाखा रहल बावै । फोनिजमे चार हजार ढिउर आदिबासी जनजाति पत्रकार आवद्ध रहल बाटै । फोनिज संघीय समितिके अनुसार सातौं महाधिवेशनमे ४२४ जाने प्रतिनिधि भाग लेहल रहिट ।
फोनिजके मुख्य उद्देश्य आदिबासी जनजातिके सवाल ओ अधिकारके पैरवी कैना, आदिबासी जनजाति पत्रकार मातृभाषी पत्रकारिताके स्तरबृद्धि तथा सशक्तीकरणके पहल कैना तथा आदिबासी जनजातिके भाषा, संस्कृति, संस्कारके प्रवद्र्धन कैना रहल फोनिज केन्द्र जनैले बा । राज्यके सक्कु संरचनामे आदिबासीके पहुँचके लाग दवावमूलक कार्यक्रम फेन फोनिज कैटी आइल बा ।
फोनिज केन्द्रीय अध्यक्ष डण्ड गुरुङके अध्यक्षतामे हुइल महाधिवेशनके उदघाटन लुम्बिनी प्रदेशके प्रमुख अमिक शेरचन करल रहिट ।
