तयारी पुरा, उद्घाटन मुख्यमन्त्रीसे कैना
सुदूरपश्चिम महोत्सवके १५औं संस्करण आजसे धनगढी–१ पशुपति टोलमे सुरु हुइटी बा ।
महोत्सव आयोजक कैलाली उद्योग वाणिज्य संघ बुधके रोज महोत्सव उद्घाटनके पूर्व सन्ध्यामे आयोजित पत्रकार सम्मेलनमे तयारी पुरा हुइल जनैले बा । संघके अध्यक्ष पुष्पराज कुवँर तयारी पुरा हुइल ओ उदघाटन सुदूरपश्चिम प्रदेशके मुख्यमन्त्री त्रिलोचन भट्टसे हुइना जनैलै ।
सुदूरपश्चिम प्रदेशके पर्यटन, कृषि ओ उद्योग व्यापारके विकास तथा विस्तारके साथे संस्कृति ओ कलाके प्रवद्र्धनके महोत्सवके आयोजना करल अध्यक्ष कुवँर बटैलै । महोत्सव स्टलहे लौवा दुल्हीहस सजैना काम हुइटी रहल बा कलेसे बुधसम ९५ प्रतिशत स्टल वुक हुसेकल पत्रकारमे जनाकारी डेहल बा ।
सुदूरपश्चिमवासीसे गर्वके साथ पर्वके रुपमे मन्टी आइल सुदुरपश्चिम महोत्सव व्यापार व्यवसायके जगतमे उत्कृष्ट ओ अनुपम नमुनाके रुपमे रना विश्वास लेले बटी,’ अध्यक्ष कुवँर कहलै– ‘महोत्सवमे वृहत व्यवसायिक कृषि प्रदर्शनी तथा प्रतियोगिता ताजा तरकारी ओ कृषिमे आइल प्रविधि संगे मच्छी, केरा, पोल्ट्री, दुग्धजन्य पदार्थ, च्याउ आदी व्यवसायहे प्रदर्शनीमे विशेष जोड डेहल बा ।’
महोत्सवमे स्थानीय उत्पादन, महिला उद्यमीहे प्रोत्साहन करल बा । कलेसे कृषि, जडिवुटी, हस्तकला, फर्निचर, अटोमोवाइल्स, गारमेन्ट, इलेक्टोनिकल, होटल ओ सूचना प्रविधि करके २५० जटरा संख्याके स्टलके सहभागिता रहल उहाँ बटैलै ।
सास्कृतिक रुपमे धनी सुदूरपश्चिमके कला संस्कृतिके संरक्षणसंगे विगतके दिनमे महोत्सवसे उत्पादन करल कलाकारहुक्रे आज जैसिक देश विदेशमे ख्याती कमैले बटै उहे कार्यहे निरन्तता डेटी यी क्षेत्रके कला संस्कृतिमे सम्भावना रहल ओ योगदान डेहल कलाकारहुकनहे स्टेजमे प्राथमिकता डेना कहल बा ।
महोत्सवमे यी क्षेत्रके उद्यमी व्यवसाय उत्पादनहे प्राथमिकता डेजैना कलेसे नेपाल अधिराज्यसे अइना उद्योगी व्यवसायीहुकनहे सम्मानित रुपमे सहभागिता करैना कहल बा । सुदुरपश्चिमके परिकार सहितके महोत्सव स्थलमे खाना खाजाके स्टल रहना बा । जेकर सरसफाइ तथा उत्कृष्ट व्यवस्थापनके लाग होटल व्यवसायी संघसंग समन्वय करल बा ।
अनुमानित २ करोडके लगानीमे हुइटी रहल महोत्सव उद्योगी व्यवसायके १० करोड वरावरके कारोवार हुइना अनुमान करल बा । कलेसे यी वर्षके महोत्सवमे करिब ४ लाख व्यक्तिसे अवलोकन कैना अनुमानफे करल आयोजक जनैले बा । महोत्सवहे भब्यरुपमे सम्पन्न कैना मुल समिति सहित २१ उप समिति रहल बा ।
सुरक्षाके दृष्ट्रिकोणसे पूर्णरुपमे अत्याधुनिक सि सि क्यामरासे निरिक्षण करजैना बा कलेसे नीजि ओ सरकारी सुरक्षाकर्मीके व्यवस्था करल बा । पहिलेक से फरक ठाउँमे रहल ओरसे सुरक्षा निकायमे सुरक्षा व्यवस्थाहे चुस्त कराडेना ओ मौसमके चुनौती रहल ओरसे नगर प्रमुख मार्फत विपदके लाग सजक ओ सचेत हुके दमकल लगाएत सुरक्षा सामाग्री सहित तयारी अवस्थामे जनशक्ति व्यवस्थापन करडेना अनुरोधफे करल बा । महोत्सवमे भारतके चर्चित रमाइलो मेलाफे रहल बा ।
उद्घाटनके पूर्व सन्ध्यमे आज विफेक रोज सकारे साढे ७ बजे ट्राफिक चोकसे महोत्सव स्थलसम टमान झाँकी सहिट प्रभातफेरी हुइना आयोजक जनैले बा ।
