कम शुल्कमे अर्गानिक खानाके स्वाद,पर्यटकके डगरा हेर्ती माघी होमस्टे थारु गाउँ,

समाचार १५ बैशाख २०७८, बुधबार Hits : 107
कम शुल्कमे अर्गानिक खानाके स्वाद,पर्यटकके डगरा हेर्ती माघी होमस्टे थारु गाउँ,

गीता चौधरी
धनगढी, कैलालीके सुख्खर बजार लग्गे रहल माघी होमस्टे थारु गाउँ पर्यटकहे स्वागत कैना प्रतिक्षामे बा । थारु गाउँघरमे उत्पादित अर्गानिक खैनाचिज कम शुल्कमे थारु स्वाद प्राप्त करे सेक्ना होमस्टे सञ्चालकके कहाइ बा ।

धनगरही बजारसे करिब ५३ किलोमिटर, कर्णाली चिसापानीसे ३६ किलोमिटर ओ सुख्खर बजारसे ६ किलोमिटर दूरीमे पर्ना थारु होमस्टे माघी गाउँमे १६ घरमे होमस्टे सञ्चालन बा । हरेक घरेम दुई कोन्टी ओ चार वेडके व्यवस्था रहल होमस्टेमे एक रातमे ६४ जनहनहे सुताइ सेक्नाव्यवस्था रहल होमस्टे सञ्चालक समितिके सचिव महेश चौधरी बतैल बतै।

होमस्टेमे आकर्षण ओ पहुना स्वागतकेलाग थारु सांस्कृतिक कार्यक्रम देखैना व्यवस्था रहल सचिव चौधरी जानकारी देहले बतै । उहाँकेअनुसार थारु झुम्रा, सखिया ओ लठ्ठी नाचके व्यवस्था रहल बा । थारु घरेम होमस्टे सञ्चालन हुइलेक ओरसे थारु खेतबारीमे उब्जाइल अर्गानिक टिना ओ खाद्यान्नके स्वाद लेह मिलथ । होमस्टेमे अइना पहुनाके लाग गाउँमे उब्जाइल खाद्यान्न सामान ओ मासुजन्य वस्तुके उब्जानी पर्याप्त रहल होमस्टे सञ्चालक बतैनै ।

वि.सं.२०७१ से शूरुहुइल होमस्टेमे पहुनाहे प्रति कोन्टी शुल्क ४ सय तोकल बा । ओस्ताके दुई बेडके व्यवस्था बा । अस्ते खाना सादा १५० ओ मासुखाना २०० से २५० सम शुल्क निर्धारण करल सचिव चौधरी जानकारी देहनै ।

चुरै पहारके काखेमे रहल उ होमस्टेमे अइना पर्यटकहे अलग्गे आनन्द ओ मजा अनुभूति हुइना करल सचिव चौधरीे बतैनै ।
चारुओर प्राकृतिक वनजङ्गलसे भरिभराउ होमस्टेसे घोडाघोडी तल्वा जम्मा ३ किमी दूर बा । घोडाघोडी नगरपालिका वडा नं. ४ मे अवस्थित माघी थारु गाउँ होमस्टेके उत्तर ओ पूरुबमे गैंराखेरा गाउँ, पश्चिममे रामपुर ओ दखिणमे सीमतरी गाउँ अवस्थित बा ।
तारागाउँ विकास समितिसे करिब चार लाख रुपियाँमे होमस्टे प्रवेश द्वारमे पक्की गेट निर्माण कैगिल बा । होमस्टेमे प्रायः अनुसन्धानकर्ता, अवलोकनकर्ता ओ आन्तरिक,बाह्यय पर्यटक अइना करल सचिव चौधरी जानकारी देहनै । उहाँकेअनुसार मासिक १ सयसे २ सय सम्म पर्यटक होमस्टेमे अइना करल बतैनै । विजुलीबत्ती, खैनापानी इन्टरनेट सुविधा रहल होमस्टेसम जैना डगरा ग्राभील हुइलेसे फेन डगरा बहुत चाकल बा । महेन्द्र राजमार्गसे करिब दुई किलोमिटर भित्रर पर्ना होमस्टेमे तालिम, प्रशिक्षण सञ्चालनके लाग सुविधा सम्पन्न तालिम घरके समेत व्यवस्था रहल सचिव चौधरी जानकारी कैले बतै । हमार पहुरा डक कम

जनआवाजको टिप्पणीहरू