‘अब धनगढी दौडिन्छ’ के आठौं संस्करण इहे चैत २६ गते शनिच्चरके दिन आयोजना हुइना हुइल बा । लावा बरसके उपलक्ष्यमे हरेक बरस वैशाख १ गते हुइटी आइल प्रतियोगिता इ बरस २६ गते हुइना हुइल बा ।
धनगढीमे शुकके आयोजक धनगढी जेसिजसे पत्रकार सम्मेलन कैके प्रतियोगिताबारे जानकारी कराइल हो । धनगढी जेसिसके अध्यक्ष भुवन पाण्डे चुवाव लगायत टमान कारणसे इ बरस प्रतियोगिता आघे सारे परल बटैलै ।
‘अब धनगढी दौडिन्छ’ कना मूल नारा सहित हुइना प्रतियोगिता इ बरस ‘मुख्यमन्त्री जेसिज एभरेष्ट धनगढी हाफ म्याराथन २०२२’ के रुपमे हुइना हुइल हो ।
धनगढी रंगशालासे शुरु हुइना दौड प्रतियोगिता २१ दशमलव १ किलोमिटरके रहना जनाइल बा । प्रतियोगितामे २१ दशमलव १ किलोमिटरके खुला दौड, ५ किलोमिटरके कर्पोरेट ओ सञ्चार, ५ किलोमिटर महिला ओ विद्यार्थी तथा ट्राइसाकल रेस आयोजना हुइना जनाइल बा ।
दौड प्रतियोगितामे खुला ओर प्रथम हुउइया ५५ हजार ५ सय ५५ रुपैयाँ, डुसरा ३३ हजार ३ सय ३३ रुपैयाँ ओ टिसरा हुउइया २२ हजार २ सय २२ रुपैयाँ पैना बाटै ।
ओस्टके कर्पोरेट ओ सञ्चार ओ महिला तथा विद्यार्थी ओर पहिल, डुसरा ओ टिसरा हुउइया क्रमशः ५ हजार ५ सय ५५, ३ हजार ३ सय ३३ ओ २ हजार २ सय २२ रुपैयाँ पुरस्कार पैना आयोजक धनगढी जेसिज जनैले बा ।
प्रतियोगितामे सहभागी हुइक लाग रजिष्ट्रेशन शुल्क ३ सय (टिसर्ट सहित) ओ विद्यार्थीके लाग रजिष्ट्रेशन शुल्क २ सय(टिसर्ट सहित) निर्धारण करल बा ।
यकर साथे सहभागी धावक मध्ये गोला प्रथासे एकजाने भाग्यशाली धावकहे आकर्षक उपहार प्रदान कैना समेत आयोजक जनैले बा ।
