धनगढी, २५ चैत । सुदूरपश्चिम प्रदेशके अस्थायी राजधानी धनगढीमे आज फारवेष्ट ट्राभल मार्ट सुरु हुइल बा । मार्टके संस्कृति, पर्यटन तथा नागरिक उड्डयनमन्त्री प्रेम आले एक समारोहके बीच उद्घाटन करलैं । मार्ट चैत २७ गतेसम सञ्चालन हुइना बा ।
पर्यटकीय सम्भावनाके उजागर, बजारीकरण करना ओ पर्यटन विकासमे टेवा पुगैना उद्देश्यले मार्ट आयोजना करल बा । कार्यक्रममे नागरिक उड्डयनमन्त्री प्रेम आले सुदूरपश्चिमके धनगढीमे नेपाल पर्यटन बोर्डके कार्यालय स्थापनासे पर्यटन विकास करना मार्गदर्शन प्राप्त हुइल बटैलैं ।
कार्यक्रममे उद्योग, पर्यटन, वन, तथा वातावरणमन्त्री मान धामी, सुदूरपश्चिम विश्वविद्यालय उपकुलपति अम्मरराज जोशी, धनगढी उपमहानगरपालिका नगरप्रमुख नृपबहादुर वड, टीकापुर नगरपालिका उपप्रमुख केशरी रावल, प्रमुख जिल्ला अधिकारी किरण थापा, प्राध्यापक डा. हेमराज पन्तलगायत मन्तव्य व्यक्त करले रहैं ।
मार्टमे ३० ठो स्टल रहल फारवेष्ट ट्राभल मार्टके संयोजक माया प्रकाश भट्ट जानकारी करैलैं । मार्टमे स्वदेशी तथा विदेशी करके ३०० से ढेर पहुना रहना ओ पहिल दिन आज व्यावसायिक अन्तरक्रिया (बी टु बी) हुइना बा ।
मार्टमे भारतके दिल्ली, नैनीताल, देहरादुन, खटिमा लगायतके ठाउँके पर्यटन व्यवसायी, टुर अपरेटर, गाइड, सञ्चारकर्मी अइल बटैं । मार्टके दुसरा दिन अतिथिहुकनहे धनगढीके शिवपुरी धाम, जाखोर ताल, बेहडाबाबा, कञ्चनपुरके लिंगा हुइटी शुक्लाफाँटा राष्ट्रिय निकुञ्ज, दोधारा चाँदनी झोलुंगे पुलके भ्रमण करैना जनाइल बा ।
नेपाल पर्यटन बोर्ड ओ धनगढी उपमहानगरपालिकाके आर्थिक सहयोगमे नाट्टा सुदूरपश्चिम धनगढीस्थित रुबस होटलमे मार्ट आयोजना हुइटा । उ मार्टमे नेपाल–भारतके सरोकारवालाहुकनके सहभागिता रहल बा ।
