बिफे भादौ ०२ | थारु संम्बत:२६४५
२ भाद्र २०७९, बिहीबार
August 18, 2022

आयमूलक सीपमे थारु महिला

८ बैशाख २०७९, बिहीबार
आयमूलक सीपमे थारु महिला

घरक् काममे किल सीमित ना महिलनके आब उ दिन नैरहिगैल । मौका ओ सीप सिखे पैलेसे हरकोइ समाजमे मजा काम कैके डेखाइ सेक्ठैं ।

कञ्चनपुर जिल्लक् कृष्णपुर नगरपालिका–६, महाकाली सामुदायिक वन उपभोक्त समूहके आयोजनामे स्थानीय महिलनके लाग टमान मेरके सीपमूलक कार्यक्रम संचालन हुइल बा । अपन गाउँठाउँक् स्थानीय महिलनहे स्वरोजगार हुइक लाग सामुदायिक वनसे ३ ठो आयमुलक कार्यक्रम सुरु हुइल बा ।

उ सीपमूलक कार्यक्रम अन्तर्गत १० दिनके डोना टेपरी बनैना तालिम, एक महिनाके बेंटबाँसके सरसामान बनैना तालिम ओ एक महिनाके लहंगा चोलिया बनैना तालिमहे आघे बर्हैटि रहल आयोजक समूह पहुरा दैनिकहे जनाइल ।

महाकाली सामुदायिक वन उपभोक्ता समूहसे ५१ प्रतिशत महिलनहे सामुदायिक वन अन्तर्गत कार्यक्रममे जोरे पर्ना नीतिहे कार्यन्वयन करक लाग स्थानीय महिलनहे स्वरोजगार ओ जागरुक कराइक लाग अइसिन कार्यक्रमके सुरुवात करल समूहके अध्यक्ष वीरबहादुर राजवंशी बटैलैं ।

महाकाली सामुदायिक वन उपभोक्त समूहके इहे आर्थिक बरसके विनियोजित रकमके एक लाख ५० हजार रकमसे महिला सशक्तीकरण, उद्यम विकास, ओ गरिबी कम कराइक लाग इ मेरके सीपमूलक कार्यक्रम लानल समूहके अध्यक्ष राजवंशी कहलैं, ‘वन विकास अन्तर्गत वन सरंक्षणमे २५ प्रतिशत रकम विनियोजित कैके इ कार्यक्रम करटी,’ उहाँ कहलैं ।

थारु समुदायमे भोजकाज, मर्नीकर्नी, ओ पूजापाठ कैना काममे डोना टेपरा ढेर बेल्सना हुइलेक ओरसे हेरेटि गैल डोना टेपराहे व्यावसायिक रुपमे विकास कैना ओ स्थानीय महिलनहे स्वरोजगार हुइक लाग अइसिन तालिमके काम आघे बर्हाइल अध्यक्ष राजवंशी बटैलैं ।

अस्टके थारु लहंगा चोलिया फेन बजारमे ढेर माँग हुइलेक ओरसे सिलाइ कटाइमे रुचि रहल महिलनहे लहंगा चोलिया सिए सिखैना सीप सुरु करल बात समूहके सहसचिव सीता चौधरी बटैलैं । उहाँ कहलैं, ‘इ सीप सिख्के गाउँक् महिलन कुछ अपनही करे सेकहीं कना आस कैले बटि ।’

हरेक मनैन ठन कुछ ना कुछ सीप रहठ । मने उ सीपहे अपन जीवनमे सबजाने व्यावसायिक रुपमे बेल्से नैजानके बेरोजगार हुइल रठैं । ओहे ओरसे महाकाली सामुदायिक वन उपभोक्त समूह स्थानीय महिलनहे लक्षित कैके फेन हरेक साल सीपमूलक काम नन्टी रहल समूहके मनैं बटैठैं । अस्टे कैके इ साल फेन बेंटबाँसके तालिम फेन महिला ओइने सिख्ना मौका पैले बटैं ।

कञ्चनपुरके कृष्णपुर नगरपालिका वडा नम्बर ६ मे पर्ना बर्का बनजरिया, छुट्की बनजरिया, ओ बसन्तपुर पुरुवाके स्थानीय महिला लोग टमान मेरके सीप ओ आयमूलक काम सिख्के आत्मनिर्भर हुइटी गैल बटैं । १९७.५६ हेक्टर क्षेत्रफलमे फैलल इ महाकाली सामुदायिक बनुवाँसे अब्बे गाउँक् महिला कैयो मेरके काम पाके रोजगार हुइल अध्यक्ष राजवंशी बटैलैं ।

अटरै किल नाही इहे सामुदायिक वनसे पोरसालसे उद्यम विकास कार्यक्रम मार्फत घुम्ती कोषसे व्यावसायिक टिना खेटी, बंगुर पालन, छेगरी पालन, मुर्घी पालन लगायत कार्यक्रम फेन कैटी आइल बा । जिहिसे गाउँक् आर्थिक स्थिति कमजोर रहल महिलनके जीवनस्तर मजा हुइल अध्यक्ष राजवंशी कहाइ बा ।

अझकल स्थानीय निकायसे मेरमेरिक कार्यक्रम अइटि रहल ५ नम्बर के वडाध्यक्ष आशुराम चौधरी बटैलैं । “इहे साल ५ नम्बरमे स्थानीय महिलनहे लक्षित कैके बेंटबाँस, ढकिया बिनाइ, सिलाइ कटाइ, व्यावसायिक टिना खेटी तालिम डेले बटि” उहाँ कहलैं, “इ तालिम लेहल महिला ओइने अझकल अपनही स्वरोजगार हुइल बटैं ।”

गुलरिया बजारसे २ किलोमिटर डख्खिन ओर रहल महाकाली सामुदायिक वन उपभोक्त समूहमे बर्का बनजरिया, छुट्की बनजरिया, ओ बसन्तपुर पुरुवा मिलाके २३८ घरधुरी बा । जेम्ने ९० प्रतिशत थारुनके घर बा ।