धनगढी, ८ वैशाख । नेकपा माओवादीके अध्यक्ष पुष्पकमल दाहाल प्रचण्ड तोकल समयमे स्थानीय तहके निर्वाचन हुइना बटैले बाटै । बिफेक रोज धनगढी विमानस्थलमे प्रेस सेन्टर कैलालीसे आयोजना करलर पत्रकार सम्मेलनमे बोल्टी उहाँ वैशाख ३० गते नै निर्वाचन हुइना बटाइल हुइट ।
‘कतिपय व्यक्ति गठबन्धन निर्वाचन सारी कि कना हल्ला चलैले रहिट’, उहाँ कहलै, ‘बुधके रोज देशभरके सक्कु महानगरपालिका ओ उपमहानगरपालिकामे सहमतिके टुङ्गो लागसेकल बा । आब टे कुछ कन्फूज नैहो ? वैशाख ३० गते नै स्थानीय तहके निर्वाचन हुइ ।’
इ निर्वाचनहे स्वच्छ, निष्पक्ष ओ धाँधली रहित बनैना ओ व्यापक जनसहभागिता सुनिच्छित कैना ओ लोकतन्त्रके अभ्यासहे नयाँ स्तरमे उठैना आवश्यकता रहल समेत बटैलै ।
उहे बिच अध्यक्ष प्रचण्ड नेपाल राष्ट्र बैंक गभर्नर महाप्रसाद अधिकारीहे हटैना विषयमे प्रधानमन्त्री शेरबहादुर देउवा ओ अर्थमन्त्री जनार्दन शर्माबीच सल्लाह हुइल बटैलै । गभर्नरके विषयमे प्रधानमन्त्री ओ अर्थमन्त्रीके सल्लाह हुइल जिकिर कैटी उहाँ सुरुसे गभर्नर ओ सरकारबीच तिक्तता पैदा हुइल समेत बटैलै ।
‘सुरुसे गभर्नर ओ सरकारके बीचमे समस्या डेखल रहे । अर्थमन्त्री ओ प्रधानमन्त्री सल्लाह कैके ओइसीन निर्णय करल कना प्रष्ट होसेकल बा’, उहाँ कहलै, ‘१३ गते अदालतमे डुनु जनहनके बात आइ । ओकरपाछे किल का हुइल हो कना कहे सेकजाइ । अब्बे कुछ नैकहे सेकजाइ ।’
४ चैतके मन्त्रिपरिषद् बैठकके निर्णयअनुसार २५ चैतसे निलम्बनमे परल अधिकारीहे राष्ट्र बैंक जैना डगरा मंगरके सर्वोच्च अदालत खुला डेहल रहे ।
मंगरके ‘गभर्नर अधिकारीहे पदीय जिम्मेवारी पूरा करे डेना’ कहिके प्रधानमन्त्री तथा मन्त्रिपरिषद्के कार्यालयके नाउँमे अल्पकालीन अन्तरिम आदेश डेहलपाछे अर्थमन्त्रीउपर नैतिक प्रश्न उठल रहे । अर्थमन्त्री राजीनामे डेहे परल आवाज उठ्टी रहल बेला प्रचण्ड प्रधानमन्त्रीके सल्लाहमे ओइसीन निर्णय हुइल बटाइल हुइट ।
