गठ्बन्धन सरकार बनैना तीन दिनके समय

समाचार २८ बैशाख २०७८, मंगलवार Hits : 292
गठ्बन्धन सरकार बनैना तीन दिनके समय

काठमाडौं, २८ वैशाख । प्रधानमन्त्री केपी शर्मा ओली पदमुक्त हुइटीकलि गठबन्धन सरकार निर्माणके प्रक्रिया आघे बश्रल बा । राष्ट्रपति विद्यादेवी भण्डारी सोम्मार साँझसे लागू हुइना करके संविधानके धारा ७६ (२) अनुसार गठबन्धन सरकार निर्माणके लाग राजनीतिक दलहे बिफे साँझ ९ बजेसम दाबी पेस करना समयसीमा तोकले बाटी ।

राष्ट्रपतिसे डेहल समयसीमाभित्तर विपक्षी गठबन्धनसे बहुमत जुटाइ नैसेकलमे संविधानके धारा ७६ (३) अनुसार कामचलाउ प्रधानमन्त्री ओली पुनः अल्पमतके प्रधानमन्त्री नियुक्त हुइही ।

विपक्षी गठबन्धनसे काँग्रेस सभापति एवं संसदीय दलके नेता शेरबहादुर देउवाके नेतृत्वमे सरकार गठनके प्रयास करले बाटै मने बहुमत संख्या प्रस्ट नैहुके वैकल्पिक सरकार बन्ना सुनिश्चितता भर डेखाइल नैहो ।

ओली पदमुक्त हुइटिकिल काँग्रेस सभापति देउवा, माओवादी केन्द्रके अध्यक्ष पुष्पकमल दाहाल ओ जनता समाजवादी पार्टी (जसपा) के अध्यक्ष उपेन्द्र यादव गठबन्धन सरकारके लाग संयुक्त प्रयास आघे बह्रैले बाटैं । ओली विश्वासके मत गुमैटिकिल देउवा, दाहाल ओ यादव संयुक्त विज्ञप्तिमार्फत राष्ट्रपति विद्यादेवी भण्डारीहे सरकार निर्माणके लाग संविधानके धारा ७६ (२) के प्रक्रिया आघे बह्रैना आग्रह करले रहैं ।

राष्ट्रपतिसे गठबन्धन सरकार निर्माणके लाग मौका डेहलपाछे विपक्षीहे अपन पक्षमे बहुमत जुटैना चुनौती बह्रल बा । एमालेके झलनाथ खनाल–माधवकुमार नेपाल समूह वा जसपा अध्यक्ष महन्थ ठाकुर पक्षहे ताने सेकलेसे किल विपक्षी गठबन्धनमे बहुमत पुगे सेकी । खनाल–नेपाल समूह ओलीहे विस्थापित करना विपक्षी गठबन्धनहे सघैना कटि सोम्मार विश्वासके प्रस्तावउप्परके मतदानमे पार्टी ह्वीप उल्लंघन करटी अनुपस्थित हुइल रहैं ।

काँग्रेस सभापति देउवा मंगरके अपने निवास बूढानीलकण्ठमे विपक्षी गठबन्धनके बैठक ढरले बाटैं । ओम्ने खनाल–नेपाल पक्षहे फेन आमन्त्रण करल देउवानिकट स्रोत बटैले बा । विश्वासके प्रस्तावउप्पर सोम्मार हुइल मतदानके परिणामहे आधार लेना हो कलेसे देउवा नेतृत्वमे गठबन्धन सरकार बनैना तत्काल १२ मत नैपुग्ना डेखाइठ । प्रतिनिधिसभामे कायम १ सय ७१ मतके बहुमत १ सय ३६ मत पुगाइ सेक्लेसे किल विपक्षी गठबन्धन सरकार बनैना दाबी पेस करे सेकी । सोम्मारके मतदानमे विपक्षी गठबन्धनके पक्षमे १ सय २४ मत परल रहे ।

देउवा अपन नेतृत्वमे सरकार बनैनाके जसपाके ठाकुर पक्ष वा एमालेके खनाल–नेपाल पक्षके भर परेपरना हुइल बा । ह्वीप उल्लंघन करलेसे फेन एमाले अध्यक्षसमेत रहल प्रधानमन्त्री ओली खनाल–नेपाल पक्षके सांसदहे तत्काल कारबाही नैकरे सेक्ठैं । खनाल–नेपाल पक्षके एकठो किल उद्देश्य ओलीहे विस्थापित करना बा । जसपाके ठाकुर पक्ष नैअइलेसे विपक्षी गठबन्धनके पक्षमे बहुमत पुगैना खनाल–नेपाल पक्षके सांसदसे राजीनामा डेहेपरना परी ।

राजीनामा नैडेके देउवाहे प्रधानमन्त्री बनैना प्रस्तावमे हस्ताक्षर करके बहुमत पुगाइ फेन सेक्ठैं । ओली आवश्यक परल बेला तत्काल कारबाही करना प्रक्रिया पूरा करके बैठलहे ओइसिन डगर जोखिम हुइना काँग्रेस नेताहुकनके कहाइ बा । ‘अभिनसमके परिस्थिति हेरलेसे खनाल–नेपाल पक्षसे राजीनामा डेलेसे किल वैकल्पिक सरकार बन्ना सम्भावना डेखाइठ,’ काँग्रेसके एक नेता कलैं, ‘प्रतिनिधिसभा ढरना÷नैढरना, ओलीहे हटैना÷नैहटैना कना निर्णायक भूमिकामे एमालेके खनाल–नेपाल पक्ष डेखाइल बा ।’

जसपाके ठाकुर ओ महतो पक्ष सरकार निर्माणमे फेन अप्ने संलग्न नैहुइना उद्घोष करसेकले बा । अँट्वारे देउवासँगके भेटमे ठाकुर ओ वरिष्ठ नेता राजेन्द्र महतो अपन सहयोग नैरहना कटी सरकार निर्माणमे लागके जसपा विभाजन करना खेलमे नैलग्ना देउवाहे आग्रह करले रहैं । यादव पक्ष कहल ओलीके विस्थापनहे मुद्दा बनैटी आइल बा । काँग्रेस सभापति देउवाके नेतृत्वमे गठबन्धन सरकार बनैना पार्टीभित्तर छलफल हुइना यादव बटैलैं । ‘हम्रे आब सघन छलफलमे जुटब,’ उहाँ कलैं ।

संसदीय दलमे ठाकुर ओ यादव पक्षके दुई÷दुई जाने सांसद सोम्मारके मतदानमे यहोरओहोर करलेसे फेन बराबरी हैसियतमे बाटैं । प्रधानमन्त्रीसे ढरल विश्वासके मतमे पूर्वराजपा धारके नेता महेन्द्रराय यादव ओ चन्द्रकान्त चौधरी यादव पक्षओर लागके विपक्षी गठबन्धनमे मतदान करले रहैं । ओस्टेक यादव पक्षके उमाशंकर अरगरिया ओ विमल श्रीवास्तव ठाकुर पक्षमे आके तटस्थ बैठ्लैं । दुनु पक्षसे एक÷एक जाने अनुपस्थित रहैं । ठाकुर पक्षके लक्ष्मणलाल कर्ण पक्ष÷विपक्षमे मतदान नैकरना निर्णय हुइल ओ कोरोना संक्रमणके कारण अनुपस्थित हुइल जनैलैं । यादव पक्षके रुही नाज मतदानमे सहभागी नैहुइली । दुनु पक्षसे दबाब आइल जनैटी उहाँ मतदानमे सहभागी नैहुइल पूर्वसमाजवादी धारके एक नेता बटैलैं ।

ठाकुर वा जसपाके संघीय परिषद् अध्यक्ष बाबुराम भट्टराई प्रधानमन्त्री बन्ना अवस्थामे बाहेक जसपा एक नैहुइना पूर्वराजपा धारके नेताहुक्रे दाबी करठैं । अपन नेतृत्वबाहेकके सरकारमे सामेल हुइना वा समर्थन जनैना पक्षमे काँग्रेस नैहो । काँग्रेस औपचारिक रूपमे अपन नेतृत्वमे सरकार बनैना निर्णय लेले बा । सरकार निर्माणमे फेन जसपा अलग–अलग कित्तामे बटे सेक्ना सम्भावना ढेर डेखाइठ । पूर्वराजपा धारके नेता राजकिशोर यादव पदाधिकारीके निर्णय सोम्मारके मतदानसमके लाग किल रहल बटैलैं ।

माओवादी केन्द्रके नेता वर्षमान पुन विपक्षी गठबन्धनके सरकार बनेक लाग जसपा निर्णायक शक्ति बनल बटैलैं । उहाँ वैकल्पिक सरकारमे जसपाके ठाकुर पक्ष फेन अइना विश्वास व्यक्त करलैं । एमालेके खनाल–नेपाल पक्षके कम्तीमे २२ सांसद राजीनामा डेलेसे विपक्षी गठबन्धनहे सरकार बनैना सहज हुइना डेखाइठ । २२ जानेक राजीनामा अइलेसे प्रतिनिधिसभामे कायम सदस्य संख्या २ सय ४९ हुइ । ओकर बहुमत पुगैना विपक्षी गठबन्धनहे १ सय २५ सांसद रलेसे पुगी मने खनाल–नेपाल समूहमे डेखाइल २८ सांसदमे ८ जाने समानुपातिकसे चुनल बाटैं । राजीनामाके निर्णय लेलेसे ओली समानुपातिक सांसदहे तत्काल हटाइ सेक्ना सम्भावना बा ।

काँग्रेस संसदीय दलके प्रमुख सचेतक बालकृष्ण खाँण प्रतिनिधिसभाहे जोगैना ओ जनताके जीवनरक्षाके लाग फेन वैकल्पिक सरकार बन्ना दाबी करलैं । ‘काँग्रेस, माओवादी ओ जसपाके गठबन्धनमे नयाँ प्रधानमन्त्रीके नियुक्ति हुइ कनामे हम्रे विश्वस्त बाटी,’ उहाँ कलैं ।

जनआवाजको टिप्पणीहरू