सेती लडियामे पानीके बहाव बह्रल, सतर्क रहना अर्जि

समाचार ४ असार २०७८, शुक्रबार Hits : 124
सेती लडियामे पानीके बहाव बह्रल, सतर्क रहना अर्जि


डोटी, ४ असार । लगातारके पानी परल ओरसे डोटीके सेती लडियामे पानीके बहाव बह्रल बा । बहाव बह्रल ओरसे लडिया आसपासके बस्तीमे खतरा बह्रल कहटि सचेत रहना जिल्ला प्रशासन कार्यालय सक्कु नागरिकहे आग्रह करले बा ।

डोटीके गोपघाट ओ दिपायलमे रहल बाढी मापन केन्द्रके अनुसार जलसतह मापनसे अधिक बह्रल बा । सेती लडियामे करल पानीके बहाव मापनअनुसार ८.४ क्युसेक पुगल बा । यी ‘वार्निङ प्वाइन्ट’ से उप्पर हो ।

केन्द्रके अनुसार ३.५ क्युसेक बाढीके बहाव हुइलेसे लडियामे बाढीके ढेर खतरा रहठ । लडिया यहाँक धान लगाइल खेत्वामे कटान करके बहाइ लागल बा । सेती लडिया आसपासके बस्ती बानीडुग्रीसैन, गोपघाट, बारपाटा, सिरखोलीसैन, कालागाढ, रामपुर, दिपायल, घोल्तडा, भागेतडा, कैलडा ओ नारीदाङके स्थानीयवासीहे विशेषकरके रातके समयमे सचेत रहना प्रहरी प्रशासन आग्रह करले बा । अस्टेक लडियामे पानीके बहाव बह्रे लागलसँगै इलाका प्रहरी कार्यालय दिपायल, प्रहरी चौकी तिल्तालीके टोली नागरिकहे लडिया क्षेत्रमे नैजैना ओ सचेत रहना माइकिङ करल बा ।

सेतीमे पानीके बहाव बह्रल ओरसे लडिया आसपासके नागरिकहे सुरक्षित रहना ओ लडियामे मच्छी मारे आइल नागरिकहे कुछ दिन लडियामे नैजैनासमेत आग्रह करल प्रमुख जिल्ला अधिकारी सुनिल खनाल बटैलैं ।

लगातारके वर्षाके कारण बाढीपहिरो अइना खतरा बह्रल ओरसे प्रजिअ खनाल विपद् व्यवस्थापनमे जुटेक लाग जिल्लाके तीनु सुरक्षा निकाय नेपाली सेना, नेपाल प्रहरी ओ सशस्त्र प्रहरीहे ‘हाइअलर्ट’ मे बैठ्ना निर्देशनसमेत डेले बटैं ।

विपद् ओ लडियासे हुइना खतरासे जोगेक लाग प्रशासन चौबीसो घण्टा सुरक्षाकर्मी हे उ क्षेत्रमे अनुगमन करना निर्देशनसमेत डेहल जिल्ला प्रशासन कार्यालय डोटी जनैले बा । जिल्लामे लगातार वर्षा हुइटी रहल ओे फेन अन्य छोट लडियामे पानीके बहाव सामान्य अवस्थामे रहल जिल्ला प्रहरी कार्यालय डोटीके प्रमुख प्रहरी उपरीक्षक (एसपी) दानबहादुर मल्ल जानकारी डेलैं ।

वर्षाके कारण यहाँक टमान ठाउँमे पहिरो गैल बा कलेसे एक दजर्नसे ढेर ग्रामीण सडक अवरुद्ध हुइल बा । वर्षा शुरु हुइलसँगे जिल्लाके ग्रामीण भेगके अधिकांश सडक अब्बे सवारी साधन नेंगे नैसेक्ना अवस्थाका हुइल बा ।

वर्षासे हिला हुइल अइसिन सडकमे सवारी साधन नेंग्ना बन्द हुइलसँगे सदरमुकाम कोइ बिरामी परलेसे फेन सदरमुकामके अस्पतालसम लैजाइ सेक्ना अवस्था नैरहल ओ सदरमुकामसँग गाउँघरके सम्पर्कसमेत विच्छेद हुइ लागल जोरायल गाउँपालिका–५ के पूर्णबहादुर विष्ट जानकारी डेलैं ।

ओहोर जिल्लाके जोरायल ओ बिपीनगरमे रहल ठूलीगाडमे समेत पानीके सतह बह्रल ओरसे सतर्क रहन आग्रह करल जोरायल गाउँपालिकाके अध्यक्ष दुर्गादत्त ओझा जानकारी डेलैं । जिल्ला विपद् व्यवस्थापन समितिके अनुसार हालसम पहिरोके कारण जिल्लामे १ जहनके ज्यान गैल बा कलेसे २ बालिका घाहिल हुइल बटैं ।

जनआवाजको टिप्पणीहरू