बाजुरा: बाजुराके बुढीगंगा नगरपालिकाम रुकल स्थानीय तहके निर्वाचन काल बिहीबार हुइना बटाइल बा । गिल वैशाख ३० गते हुइल निर्वाचनम नेपाली कांग्रेस ओ नेकपा एमालेबीच मतदान म बात निमिल्ल पाछ मतदान रुकल रह ।
काल हुइना निर्वाचनके लाग सक्कु तयारी होसेक्ल प्रमुख जिल्ला अधिकारी प्रकाशचन्द्र अधिकारी जानकारी देल बाट । बिहीबार बिहानक ७ बजेसे हुइना मतदानके लाग सुरक्षा व्यवस्थाम कडाइ करल उहा बटैल । मतदानके लाग एक हजार से धेर सुरक्षाकर्मी खटल बाट । १० ठो मतदानस्थल रहल पालिकाम सक्कु मतदानस्थलम करिब १ सयके हाराहारीम सुरक्षाकर्मी खटाइल सुरक्षा निकाय जनैल बा । मतदानस्थलम मतदान हुइना मितिके एक हप्ता आघ से नेपाली सेना, सशस्त्र प्रहरी, जनपथ प्रहरी ओ राष्ट्रिय अनुसन्धानके सुरक्षाकर्मी परिचालित होसेक्ल बाट ।
वैशाख ३० गते हुइल स्थानीय तहके निर्वाचनम स्वच्छ, निष्पक्ष ओ स्वतन्त्र वातावरणम मतदान निहुइल पाछ निर्वाचन आयोग फेर निर्वाचन कर्ना निर्णय कर्ल रह । जेठम बैठल सर्वदलीय बैठकम असार २३ गते हुइना राजनीतिक दलके सहमतिपाछ बुढीगंगाम फेर निर्वाचन हुइ लागल हो।
