सोम्मार कार्तिक ०१ | थारु संमब:२६४४
१ कार्तिक २०७८, सोमबार
October 18, 2021

थारु ओइनके आझ जेउँरा ढर्ना

२२ आश्विन २०७८, शुक्रबार
थारु ओइनके आझ जेउँरा ढर्ना


धनगढी, २२ कुवाँर । हिन्दु परम्परा अनुसार डुटिया हेरलक दिन जेउँरा ढर्ना चलन रहल बा, मने थारु समुदायसे भर आझ सकारे जेउँरा ढरटी रहल बटंै ।

थारुहुक्रे भर परम्परासे डुटिया हेरलक डोसर दिन जेउँरा ढरटी आइल चलन अनुसार आझ सकारे विधि रुपमे जेउँरा ढारे लागल हुइट । पञ्चाङ निर्णायक समितिसे भर जेउँरा ढरना (घटस्थापना) के उत्तम साइट विफेक रोज दिनके ११ः४६ टोक्ले रहे ।

थारु बृद्धिजीवी ओ धनगढी उपमहानगरपालिका वडा नम्बर ८ धनगढी गाउँक् भल्मन्सा सरोज चौधरी थारु समुदाय पुर्खोसे डुटिया हेरलक डोसर दिन जेउँरा ढरटी आइल ओरसे अपनेहुक्रेफें आझ सकारे लहालहुके जेउँरा ढरना बटैलंै ।

उहाँ कहलै, ‘हमार पुर्खाहुक्रे अभिनसम डुटिया हेरलक डोसर दिन जेउँरा ढरिट, उहे अनुसार हम्रे ओइनके सिखाइल चालचलनहे निरन्तरता डेटी आइल बटी ।’ सकारे या साँझके लहालहुके डेउटनके कोठक् पाटामे (डेहुरार) जेउँरा ढरटी आइल उहाँ कहलंै । आघेक बरस धुमधामसे टरटिहुवार मनाइल मने यी बरस भर कोरोनाके जोखिम रहल ओरसे परिस्थिती हेरके डशिया मनैना भल्मन्सा चौधरी बटैठंै ।

‘डशियामे टिकाके रोज भल्मन्सक घर गाउँ भरिक मनै जुटके सामुुहिक रुपमे टिका चलैना चलन बा,’ भल्मन्सा सरोज कहलै, ‘यी बरस कोरोना संक्रमणके संन्त्रास रहल बा, प्रशासनसे जारी करल सूचना अनुसार टिका लगैना ओ डशिया मनैना कार्यक्रम तय कैजाइ ।’ कोरोना संक्रमण तिब्र गतिमे बर्ह्रटी रहल ओरसे गाउँबासीनहे सचेत हुके घरघरमे डशिया मनैना भल्मन्सा आग्रह करलैं ।

थारु नागरिक समाज कैलालीके संयोजक दिल बहादुर चौधरीफें थारु समुदायसे डुटिया हेरलक डोसर दिन ढेर जैसिन थारुहुक्रे जेउँरा ढरटी आइल बटैलैं । उहाँ कहलै, ‘हम्रेफें जेउँरा नैढरले हुइ, पुर्खाहुक्रे डुटिया हेरलक डोसर दिन जेउँरा ढरिट उहे अनुसार आझ सकारे विधि अनुसार जेउँरा ढरटी ।’

थारु कल्याणकारिणी सभाके केन्द्रीय सदस्य ओ थारु बुद्धिजिवी प्रभातकुमार चौधरी हिन्दु परम्परा अनुसार डुटिया हेरलक दिन जेउँरा ढरना चलन रहल मने कोइकोइ थारुहुक्रेफें आब ज्योतिसके पत्र हेरके ओकर सिको करे लागल बटैलंै ।

धनगढी उपमहानगरपालिका वडा नम्बर ५ जाँई गाउँक् भल्मन्सा कुलविर चौधरीफें अपनेहुक्रे पुर्खासे चलन अनुसार आझ सकारे जेउँरा ढारे लागल बटैलंै । उहाँ आने सालक डशिया रहरङगी करटी, नाँचगान करटी मनागैल, मने अशौ भर कोरोना संक्रमणके डर बा, ज्यादा भीरभार नैकरके घरघरमे डशिया विचार रहल बटैलैं ।

थारु महिला बुद्धिजीवी ओ थारु कल्याणकारिणी सभाके पूर्व सहमहामन्त्री इन्दिरा चौधरी कहली, ‘पहिले–पहिले थारुहुक्रे डुटिया हेरके डोसर दिन जेउँरा ढरिट मने कोक्रो–कोक्रो भर डुटियक हेरलक रोजफें ढरना चलन बटिन ।’

उहाँ कहलै, ‘आने सालके डशियक टिका गाउँभरिक मनै जुटके भल्मन्सक घर लगाजाए, यी बरस भर सामाजिक दुरी कायम करटी मास्क सेनीटाइजरके व्यवस्था सहिट डशिया ठन्वामे मनैना ओ टीका लगैना सल्लाह हुइटी बा ।’

यी बरसके डशिया सुरु होसेकल ओरसे २५ गते दहितथारुनके श्राद्ध डेना दिन, २६ गते पैनसटोपी ढुइना दिन, २७ गते ढिकरहुवा, २८ गते पिटरहुवा÷मुर्गी पुज्ना दिन ओ २९ गते टिका लगैना दिन परल बा ।

[TheChamp-FB-Comments]