धनगढी, ८ कात्तिक । यातायात ओ विद्युत सेवा अवरुद्ध हुँइबेर सुदूरपश्चिमके पहारी जिल्लामे उपचार सेवा प्रभावित हुइ लागल बा । बाजुरा, बझाङ, डोटी ओ दार्चुला जिल्ला जोर्ना मुख्य राजमार्गसहित ग्रामीण डगर पुरा रुपमे सुचारु नैहुइलसम बिमरेनके उपचारमे समस्या हुइ लागल हो ।
डगर मार्ग अवरुद्ध हुइल जिल्लामे बिमरेनहे अस्पताल नन्ना ओ उपचार करे नैसेक्ना बिमरीनहे रेफर करेबेर समस्या हुइ लागल बटिन । बैतडीमे मुख्य राजमार्ग सुचारु हुइलेसे फेन ग्रामीण डगर सुचारु नैहुइलसम उपचार ओ खोप वितरणमे समस्या हुइटी रहल स्वास्थ्य कार्यालय बैतडीके प्रमुख योगेश भट्ट दिनेशखबरहे बटैलैं । ’बैतडीमे मुख्य राजमार्ग सुचारु हुइलेसे फेन ग्रामीण डगर अवरुद्ध नै बा,’ उहाँ कहलैं, ‘पुर्चौडी, शिवनाथ ओ पञ्चेश्वरमे नियमित खोप लैजैना फेन समस्या हुइल बा ।’
अछाम जिल्लामे जोे एम्बुलेन्सके अभाव बिमरेन रेफर कर्ना समस्या हुइल बा । सुर्खेत हुँइटी बिमरेन रेफर करे पर्ना फेन जिल्ला अस्पतालसम बिमरेनहे अइना समस्या हुइल अछाम जिल्ला अस्पतालके मेडिकल सुपरिटेण्डेन्ट डाक्टर सोनाली बास्कोटा बटैलिन् । ’एहोर एम्बुलेन्स नैहोके समस्या हुइल बा,’ उहाँ कह्लिन्। । ‘बिमरेन रेफर करे पर्ना सुर्खेतके डगर प्रयोग हुइटी रहल बा ।’
बझाङ जिल्ला अस्पतालमे जो डगरसंगे विद्युत सेवा अवरुद्ध हुँइना उपचार सेवा प्रभावित हुइल बा । जयपृथ्वी राजमार्ग ठाउँठाउँमे अवरुद्ध हुँइबेर डिजेलके आपूर्ति फेन करे नैसेक्ना ओ कुछ दिनपाछे अस्पतालके समग्र उपचार सेवा प्रभावित हुइना चिन्ता मेडिकल सुपरिटेण्डेन्ट डाक्टर सन्दीप ओखेडाके बा । ’हमार अस्पतालमे बिजुली नैरहलमे बिमरेनके उपचारमे समस्या हुइटी रहल बा,’ उहाँ कहलैं, ’जेनेरेटर चलइटी रहल बटी । तर डिजेल नैपाके कुछ दिनपाछे उपचार कर्ना बहुट मुस्किल हुइना डर बा ।’
बाजुरा जिल्लामे फेन अत्यावश्य औषधिके अभाव हुइना जनैले बा । पहारी जिल्ला जोर्ना राजमार्ग ओ ग्रामीण डगर एकदुइ दिनभिट्टर संचालन करे नैसेक्के सात पहारी जिल्लामे औषाधिसंगे खाद्यान्न लगायतके दैनिक उपभोग्य वस्तुके चरम अभाव हुइना चिन्ता करटैं ।
source:https://dineshkhabar.com/article/66430
