कविता
अइहो गोचा
अइहो गोचा,
डसिया आगैल
फरिया किन्लो किनाइ ?
झ्वाम्झ्वाम पैंयाँ लग्ना
मंजिरा सजैलो किनाइ ?
अइहो गोचा,
मन्डरिया डाडु
छल्कौवा ढोटी किन्नै किनाइ ?
उल्लर उल्लर बजैना
लावा मन्डरा सजैनै किनाइ ?
अइहो गोचा,
मोर्हिनियाँ भौजी
काम उसर्ली किनाइ ?
मन्डराके टार संगे गैना
सखियक् गीत सिर्जैली किनाइ ?
अइहो गोचा,
भलमन्सा काका
नाच कर्ना जुटौला बलैनै किनाइ ?
गाउँ बस्ती चैनार कर्ना
अंगनम डौना बेबरी लगैनै किनाइ ?
अइहो गोचा,
गुरुवा केसौका बरापु
डेउटन पुज्नै किनाइ ?
हमार बर्का डसियम्
डेंउटन खुस परनै किनाइ ?
अइहो गोचा,
बरा लग्गु आगैल निका
चुरिया गुरिया किन्लो किनाइ ?
लाल उज्जर झोंटी पर्ना
झोबन्ना सजैलो किनाइ ?
सुजु कुश्मी
गोदावरी–६ कैलाली
सुजु कुश्मी
