अई थारु तुँ कहाँ बाटो
सब्ज आपन हिस्सा अग्वारट
जग्गा जग्गाम खुँटा गारट
अँग्नक रुख्वक फल झ्वारट
तुँ कहाँ बिल्लाइल बाटो
तुहाँर मिझ्यारीम टाँग पसारट
तुँ काकर चुपचाप बाटो ?
अई थारु जागो आब ।

यी धर्ती तुहाँर फे हो
भूमिपुत्रक अशली हक तुहाँर बा
याकर रक्षा करुइया रक्षक हुइटो
सच्चा सपूत ओ सहिदन्हँक सन्तान हुइटो
खै तुहाँर अस्तित्व
खै तुहाँर निशान
खै तुहाँर आपन दिल
खै आपन मन
खै तुहाँर चम्पन बस्ती ?
अई थारु जागो आब ।

जागो आब जागो
उठो व चारुवर हेरो
मनन् करो
तुहाँर अस्तित्व हर पौलीम लुटजैटी बा
रहल ईतिहासक धरोहर मेटाजैटी बा
तुँ काजे गुमनाम बाटो हँ ?
अई थारु उठो आब ।

आपन टर टिउह्वारक नाउँ निहो
नाच डेखैना ठाउँ निहो
गीत गैना, सुनैना गाउँ निहो
मन्ड्रा घम्कैना
मन्जैरा छन्कैना
सखीया नाचक मेर्री निहो
त तुँ कसिक कबो थारु हुइटु ?
अई थारु जागो आब ।

तुहाँर ठन्वा, डेउठानम
हस्तक्षेप हुइटी बा
लौलपुरहँ नयाँगाऊँ बनाजैटी बा
बरघर्य, गुर्व, चौकीडर्व, सोह्रीन्यहँ
कुज बनाजैटी बा
घोरीघोरा टल्वहँ
घोडाघोडी ताल बनाजैटी बा
तुहाँर मन काजे निखाइठ् ?
अई थारु जागो आब ।

ढुमरु, बर्किमार, पँचरा
गुर्वावक जल्मौटीहँ
अन्धविश्वास कह्वाजैटी बा
तुहाँर ज्ञान ओ मन्टरहँ
गर्यम फेंकजैटी बा
तुँ रम्टा हेर्टी बाटो
रावण तुहाँर अस्तित्व हर्टी बा
तुँ कहाँ भुलाईल बाटो ?
अई थारु उठो आब ।

आब त,
हिन्दी किर्तनक राजनीति बा
तुँ ओम्नह झुमझुमक नाचटो
तुहाँर छावा हिफफ लगाक पप गैटी बा
डाईबाबा निकैक मम्मीड्याड कहभिरल बा
तुँ ओमहँ आपनहँ गर्व कर्ठो
त कसिक कना हो
तुँ थारु हुइटो
ओ कसिक जन्ना हो कि
तुँ जातीय स्वाभिमानक रक्षा करटो ?
अई थारु जागो आब

तुहाँर डिउह्रार रुइटी बा
छाँकी धारक अपमान हेर्क
यी जमीन रुइटी बा
तुहाँर चप्डल मूह देख्क
तुहिन भूदास बनल देख्क
तर तुँ त मुहम माटी ठप्ठ्यैल बाटोे
कहाँ हेराईल बाटो तुँ
अई थारु जागो आब ।

आब तुँ
जागो आपन मन्टर गुन्क
उठो आपन जन्टर गुन्क
आँखी खोलो
आपन अस्तित्व ओ पहिचानक रक्षा कर
अई थारु जागो आब ।
अई थारु उठो आब ।।